عيش، حرية، مواقع إباحية

بيقولوا هيقفلوا المواقع الاباحية؛ وطبعا اى حد هيحاول يعبر عن وجهة نظره هيبقى كافر وعدو الله وبينشر الرذيلة بين الناس !!

طيب تعالوا نقفل المواقع الاباحيه ونصرف ملايين عشان حجبها .. انا معاكم مفيش مشكله !!

= لأ دا فى مشكله كبيرة.

استنى يا عم انت بتشتم وخلاص . شوف كلامى للاخر وهدي اعصابك !!

فى برنامج يا سيدى اسمه بروكسي بيفتح اى موقع محجوب .  ايام الثوره كنا بنستعمله لما حجبوا مواقع التواصل الاجتماعى!

 

- برده انت عدو الله وعايز تنشر الرذيلة !!

 

= طب يا سيدى هو من العقل انى اصرف الملايين دى على حاجه مش نافعه  وحتة برنامج بينزل من على ماى ايجى مجانا يضيع اللى الحكومه بتعمله !!

 

وبعدين لما نحجب المواقع الاباحيه لانها خطره على المجتمع ؟!! طيب بالنسبه للقمر الاوربى .. هنعمل فيه ايه ؟!!

- اخرس يا عدو الله .. واحده واحده هنمنع الكلام الفارغ دا !!

= برده هيقولى واحده واحده . يا سيدى بقولك مفيش حاجه اسمها حجب مع الحاج بروكسى اللى بينزل من على ماى ايجى !!!

***

كان اولى ان حكومتنا تحجب الفقر والظلم والقهر والبطالة . إن أولى انها تحقق مطالب الثورة ... عمر ما كانت مطالب الثورة ان المحلات تقفل 10 . ولا كانت مطالبها غلق المواقع الاباحيه !!

ورغم ان مفيش حاجه اسمها حجب المواقع بسبب برنامج صغير زى دا !!! الا انى برده مش مقتنع بحجبها عن مصر .. انا فعلا مش عايز حد يدخل مواقع زى دى .. بس عايز المواطن المصرى ميدخلش وهو مقتنع ان دا غلط . لانه اتعلم صح واتربى صح . وبالالى شايف ان دا عيب !!

انما نظهر قدام العالم كله اننا مجتمع جنسى ولذلك هنحجب المواقع الاباحيه عن مصر ؟!!

لسه بردوا بتشمنى وبتقول عليا عدو الله وناشر الرزيله ؟!!! ربنا يهدى يا شيخنا !!

عيش .. حرية..  عدالة اجتماعية

عجبى من بولاق للعجمي

لما نزلنا محمد محمود كانوا بيقولوا علينا بلطجيه من خوفهم على شوية الكراسى اللى هياخدوهم فى مجلس الشعب . كان دمنا بيسيل فى الشوارع وهما كانوا بيعملوا دعايا انتخابية !!

وعجبى بقى لما دخلوا مجلس الشعب وهاجمونا بكل قوتهم ودافعوا عن الداخليه  . وقالوا إن شرعية الثورة انتهت وان الشرعيه حاليا للبرلمان .. ولما البرلمان اتحل نزلوا الميادين وقالوا إن الشرعيه لازم ترجع للثورة تانى . احجز مكان تركب فيه بسرعه !!!

عجبي لما نزلنا نكمل ثورتنا ضد العسكر فى 25 يناير 2012 اتفاجأنا بيهم  بيحتفلوا بالثورة وبيحاولوا يخرسونا ب 24 ميكروفون فى الميدان عشان صوتنا اللى بينادى بإسقاط حكم العسكر ميطلعش . اصل العسكر كان حبيبهم !!لأ والاحتفال كان 3 ايام  ورا بعض . والاغرب ان الجزيره مباشر مصر كانت سايبه الميدان اللى بيهتف ضد العسكر ومركزه على استيدج الإخوان اللى مكتوب  عليه " احتفالية ثورة 25 يناير "

عجبي لما اتهموا كل اللى هتف ضد العسكر بالخيانة وفجاه هتفوا ضد العسكر لما اكتشفوا ان مصلحتهم مش معاه . وفجأة برده كرموا العسكر  وقالوا انه حامى حمى الثورة . مش مشكله بقى دم الشهيد . احنا مش وصلنا للحكم !!

العسكر خاين . ثم بطل . ثم خاين . ثم شريف ولا يجوز محاكمته . وربما نكتشف بعد ذلك ان محاكمة العسكر حرام شرعا .!!

عجبى على ناس اتهموا القضاء المصرى بالفساد لما حسوا ان شفيق هينجح . ولما سى مرسى وصل للكرسي القضاء بقدرة قادر اصبح شريف ونزيه ونظرا لنزاهته المعهودة منذ ايام المخلوع فقد كرمه الرئيس مرسى !!!!

عجبى عليك يا  مرسي لما وعدتنا  قبل الانتخابات بانك هتعيد المحاكمات ولما نجحت بأصوات المعارضة فجاتنا بالبراءات . لان طبعا المتظاهرين مماتوش على ايد النظام السابق . دول ماتوا من كتر الضحك لما كانوا بيشاهدوا خطابات مبارك !!

عجبى عليك يا مرسى لما وعدتنا بمحاكمة المجلس العسكري وبعدين وعدت الجيش بحماية المشير وعنان . وطبعا انا كده اتاكدت ان المشير وعنان مكانوش فى المجلس العسكرى اللى انت قلت هتحاكمه .. اكيد دى تهيؤات . متظلموش الراجل يا جماعة!!

عجبى على العيش والحريه والعداله الاجتماعيه والكرامه الانسانيه اللى الثوره طالبت بيهم من سنتين ولسه مش شايفين حاجه منهم اتحققت .

عجبى على التغيير اللى حصل فيكى يا بلدى . تغيير مكانش محتاج ثوره ودم . تغيير اشخاض مش تغيير منظومه وفكر\

تغيير اقوال مش تغيير أفعال . تغير اسامي مؤسسات الدولة بدلا من تطهيرها !!!

عجبي من بولاق العجمي !